Айгөл Бариеваның кызы матурлык бәйгесендә гадел җиңгәнме?
Җырчы Айгөл Бариеваның кызы "Мисс КАИ-2018" бәйгесендә җиңү яулады. Бу хакта бәйгенең рәсми сайтында пост чыкты. Әмма әлеге язма астында бәйгедә катнашучылар оештыручыларга шелтә белдергән. Аларның сүзләренчә, җиңүчене сайлаганда дөрес хөкем итмәгәннәр.
КАИда узган матурлык конкурсының шартлары буенча, Вконтактедагы төркемдә халык фикерен ачыклаганнар. Анда Айлинәгә караганда күбрәк тавыш җыйган кыз булган. Шул сәбәпле, җиңүче дип Айлинәне игълан иткәч, бәйгене күзәтеп баручыларда дәгъва туган.
Төркемдә конкурсны оештыручылар һәм Айлинәгә карата тәнкыйть сүзләре язучылар күп булган. Тупас сүзләр дә язганнар. Конкурсны оештыручыларга карата дәгъва белдергән күп кенә комментарийлар бетерелгән.
Без Айгөл Бариева белән элемтәгә кердек. Ул: "Сез нигә әлеге сорау белән миңа мөрәҗәгать итәсез? Мин оештыручы түгел! Гомумән, хәзерге вакытны Таиландта ял итәм", - диде.
Айгөл Бариева шелтәләрнең үзенә кызык түгеллеген әйтте. "Кеше язган әйберне укымадым да, укымыйчакмын да. Кызым әлеге бәйгедә үзе теләп катнашты. Мин аңа кысылмадым да", - диде ул.
Җырчы тавыш бирүләрнең ни өчен оештырылганын аңлатты. "Тавыш бирүләр нәтиҗәсендә "приз зрительских симпатий" номинациясендә җиңде ул кыз! Кызым өчен шатланыр урынына мәгънәсез сораулар бирәсез", - дип тәмамлады сүзен.