Авырып китү сәбәпле, Илсөя Бәдретдинованың концертлары күчерелә
Бу хакта җырчы инстаграм сәхифәсендә хәбәр итә һәм тамашачыларыннан гафу үтенә.
Илсөя Бәдретдинова авырып киткән. Шул сәбәпле, Татарстанның Биектау (22 апрельдән 12 майга) һәм Балтач (23-24 апрельдән 21 майга) районнарындагы концертлары күчерелә.
Бу хакта җырчы инстаграм сәхифәсендә хәбәр итә. «Чирләп киттем бит әле. Концертларны күчерәбез. Гафу итегез, зинһар! Исәнлектә очрашырга насыйп булсын!» — дип язган җырчы.
Инстачылар һәм артист дуслары нык борчылган. Бу алар язган комментарийларда күренә: «Күз тия сиңа, Илсөя, маңгаеңа корым сөртеп йөр, кесәңә миләш ботагы сал», «Үзеңне кызганмыйсың. Эшчән син. Телефоныңны куй, ял ит, тизрәк терел»; «Килешәм, күз тия торгандыр, залга чыкканда „кәҗә тоягы“ күрсәтеп чык, беркем дә күрмәсен».