Авыру бала тугач, ире ташлаган Казан кызы "Давай поженимся" тапшыруына килгән
"Йөкле вакытта бу турыда миңа беркем дә әйтмәде", - дип сөйли Анна.
36 яшьлек Казан кызы Анна 29 октябрьдә "Давай поженимся" тапшыруында катнашты. Ул Казанда яши, карнавал костюмнары сата торган салоны бар.
Анна баласы туган көнне коточкыч хәбәр ишетә. Табиблар аңа авыру бала тудыруын әйтә. Шуннан соң Анна белән аның бергә яши торган ире арасында мөнәсәбәтләр дә тәмамлана. Ир хатынын һәм авыру баласын ташлап китә.
Аннаның "кояшлы" кызы үсеп килә, бу Даун синдромы дип атала. Балага ун яшь тула инде.
Анна авырлы вакытта аңа баласы авыру булуын әйтмиләр. "Мине Казанның иң яхшы табиблары күзәтте. Йөкле вакытта миңа беркем дә әйтмәде", - дип сөйли Анна.
Анна "кояшлы" баласы булган кешеләргә мөрәҗәгать итте. "Беркайчан да мондый баладан баш тартмагыз", - ди ул.
Хатынның ире бала тапкач килгән, алар башта бергә елашкан. Ләкин икенче көннән башлап, ире телефон шалтыратуларына җавап бирми башлаган. Ирнең анасы да бу балага каршы булган. Шулай итеп Анна үзе генә Даун синдромлы баланы үстерә, аңа әнисе ярдәм итә.
Бу тапшыруда кияү егете Аннаны сайламады.