Авырлы хатында коронавирус булса, кайсы очракта йөклелекне өзү киңәш ителә?
Сәламәтлек саклау министрлыгы йөкле хатыннарга киңәшләр чыгарган.
Йөклелеге унике атнага кадәр булган вакытта авырлы хатында коронавирус табылса, ул бик каты авырса, баласын төшертергә киңәш ителергә мөмкин. Бу турыда Россия Сәламәтлек саклау министрлыгына сылтама белән «Интерфакс» хәбәр итте.
Коронавирус авыр формада булса, дәвалауның файдасы тимәсә, унике атнага кадәрге яралгыны төшерү өчен сәбәп булуы ихтимал.
«Йөклелекне иртә срокта өзү өчен төп күрсәткеч — дәвалау терапиясе фонында йөкле хатынның хәле катлаулы булу», диелә хәбәрдә.
Коронавируслы инфекция һәм даруларның тискәре йогынтысы эмбрион өчен зур куркыныч тудыра. Методик киңәшләрдә әйтелгәнчә, әгәр йөкле хатын авырын төшерүдән баш тартса, яралгының хромосомалары аномалиясен өйрәнү өчен өстәмә тикшеренүләр ясарга була. Тикшерүләр хатынның ихтыяры буенча башкарыла.
Әгәр йөклелекнең унике атнасына кадәрге вакытта COVID-19 җиңелчә формада булса, яралгыга тискәре йогынты исбатланмаса, йөклелекне дәвам итү мөмкинлеге карала.