Авылга килгән аю бөтен халыкның котын алган, коймаларны җимереп ташлаган

Түбән Новгород өлкәсенең Медеведово авылында төнлә белән аю йөргән. Ул бөтен авыл халкын куркуга салган, ерткыч урамнар буйлап йөгергән, аннары балалар бакчасы мәйданчыгын җимереп бетергән. Бәхеткә, имгәнүче кешеләр юк, ләкин авыл халкы әле дә урамга чыгарга курка, чөнки аюны тота алмаганнар. Бу турыда РЕН ТВ хәбәр итте.

Юрий исемле ир-ат авыл урамы буйлап җиңел машинада бара, шул чакта аның каршысына аю килеп чыга. Видеорегистратор камерасы җанварны төшерә. Юрий башкаларга да хәбәр итә, үзе аюның кайларда йөргәнен төшереп бара.

«Мин якын килә башлагач, ул минем каршыга йөгерә тотынды, машина астына ташланды, аннары балалар бакчасы ягына китте. Анда мәхшәр ясагач, аю койма аша бәреп чыгып, өйләргә таба китте», — дип сөйли шаһит.

Юрий полиция чакыра. Урынга килгән хокук саклаучылар аю артыннан балалар бакчасына китә. Балалар бакчасының видеокүзәтү камерасы да ерткычны төшереп торган. Кадрларда зур аю бакча мәйданында бар нәрсәне җимереп йөргәне күренә. Кыргый ерткыч койманы ваткан, урындыкны сындырган, корабликны җимереп ташлаган.

Балалар бакчасыннан юл аша гына урнашкан йортларга да аю зыян салган. Ул коймаларны ваткан, өй тәрәзәсе каршында мышнап йөргән. Халык куркуга калган. Чөнки аюны әле дә тота алмаганнар.

«Аю урманга китте, аны тота алмадылар», — дип сөйләгән Аучылар күзәтчелеге вәкиле Дмитрий Курочкин.