Мәҗлесләр алып баручы, кызык видеолар төшерүче Айназ Габидуллина күңелле видео төшергән. Ул авылга иске киемнәр җибәрү темасын күтәргән.
Видеода алар әнисе белән бер пакет иске киемнәр бушата. Сюжет буенча, ниндидер Алсу бер пакет кием җибәргән, имеш. Иске киемнәр арасында трактор сөртерлек тә, килен театр уйнарлык та, мәктәп балаларына бирерлек тә кием табыла, аларга дигән пакетта үзләренә яраклы чалбар белән шарф булуы гына ачыклана.
Бу теманы социаль челтәрдә утыручылар күтәреп, хуплап алган.
«Өй түбәсенә менеп китә әле ул башта, капчыгы белән, анда 3-4 ел селкенмичә ята. Аны сайлап чүпкә атасың, калганын тагын 3-4 елдан ташлыйсың»;
«Вәт безнеңчә бу»;
«Элек кайтара идек, хәзер юк. Әни, бәрәңге алырга кайтучылар кияр, дип алып куя иде. Соңыннан бәрәңге алырга кайтучылар бетте»;
«Без дә шулай»;
«Без 8 капчык яндырдык»;
«Җитте инде иске-москы әйберне авылга ташырга, бөтен веранда тулы бит инде, дия безнең әти», – дип, үз тәҗрибәләре белән уртаклашучылар, рәхәтләнеп көлүен аңлаткан смайллар җибәрүчеләр бар.