Автоспортчы егетләр трассада коточкыч авариядә һәлак булган
29 яшьлек егетләр утырган машина каршы як полосага чыгып, Камазга бәрелгән.
Красноярск краенда Верхняя Бирюса-Зеледеево-Ибрюль юлында 21 мартта Lada Priora һәм Камаз машиналары кара-каршы бәрелешә. Авариядә ике егет һәлак була. Бу турыда «Вести» каналы хәбәр итте.
Мәрхүмнәрнең икесенә дә 29 яшь. Алар Красноярскидагы тәҗрибәле автоспортчылар — Андрей Наумов һәм Николай Клюфинский.
Якынча белешмә буенча, мәрхүмнәр утырган җиңел машина каршы як полосага очып чыга һәм Камазга бәрелә. Аннары Камаз каршы як полосага чыгып китә һәм Hyundai Tucson машинасына бәрелә.
Наумов һәм Клюфинский авария урынында ук һәлак була.
Йөк машинасы пассажирын хастаханәгә озаталар.
Тикшерү бара, диелә хәбәрдә.
