Автор-башкаручы Наил Табанаков: «Мин популяр түгел, шуңа күрә концертка кеше җыю авыр»
Блогер Олеся Лесная үз вакытында популяр булган, мәгънәле җырлары белән күпләрне җәлеп иткән автор-башкаручы Наил Табанаковның эш урынына килеп интервью алган.
– Ничек хәлләрегез?
– Аяк-кул исән, бәреп үтермәделәр әле.
– Ә менә сәхнәдән китүнең төп сәбәбе нинди?
– Кешене концертка җыю өчен, популяр булырга кирәк. Мин – танылган кеше, әмма популяр түгел. Шуңа күрә миңа концертка кеше җыю авыр. Нәрсәгә акча түгәргә? Зал арендасы, рекламага тоткан акча үзен акламый.
– Ә сәбәбе эчүчелек булмадымы?
– Эчүчелек дип, минем баш тартканым юк. Авызны ябып тормыйлар. Салсалар гына түгел, үзем сатып алып та эчә алам. Нәрсәгә яшереп торырга инде аны.
– Сәхнәдән киткәч, нәрсә белән шөгыльләнәсез?
– Банкетларым бар минем. Монда автосервиста да эшлим.
– Эстрадада дусларыгыз бармы?
– Дуслар бөтенләй юк алар. Мин шул Рахматуллин белән аралашам. Гади кеше дип әйтимме инде. Мин бит сәхнә артында нәрсә булганын үз күзем белән күрдем. Берсе сәхнәгә чыгып китә җырларга, икенчесе гримеркада кала, тегесен «чәйни». Аннары тегесе сәхнәдән керә, җырларга чыгып киткәнен «чәйни» башлый.
– Хәзерге вактта эстрадада кемнәрне аерып әйтер идегез?
– Иркә, Илсөя молодец. Хәзерге артистларның кассовый җырларын кабул итә алмыйм.
– Сез «плюс»ка җырлыйсызмы?
– Юк. Бер съемка булды «Ленин» мәдәният йортында, анда плюска җырларга куштылар. Мин Наилә исемле режиссер белән ачуланышып беттем, шуннан мине «ТНВ»га чакырмыйлар.
– «УНИКС»ны тутырып концерт куярга теләгегез юкмы?
– Кем килсен минем концертка зал тутырып. Хәзер анда аренда 200 мең, ди. Юк...