Мәскәүдә кулына автомат тоткан ир-ат Россия Президенты администрациясе бинасына кергән.
«Baza» телеграм-каналы хәбәр иткәнчә, аны Федераль сак хезмәте вәкилләре Ильинкадагы бинаның тамбурында ике яктан бикләп куйган. Шуннан соң полиция хезмәткәрләре килгән, хокук бозучыны тоткарлаганнар.
Ир-ат кулындагы автомат уенчык булып чыккан. Хокук саклаучылар бу ир-атның шәхесен ачыклаган: Виктор Красивскийга 69 яшь, ул СССР составындагы Украинада туган.
Тоткарланган кеше 15 ел дәвамында аны Россия Президенты кабул итүен таләп иткән, әмма аңа гел тискәре җавап килә торган булган. Бүген ул чираттагы тапкыр дәүләт башлыгы белән шәхсән очрашуга эләгергә тырышкан.
Бу сүзләреннән соң полиция хезмәткәрләре психиатрия медицинасы белгечләрен чакырткан, пенсионерны дәвалау учреждениесенә алып киткәннәр.