Җәвит Шакиров әнисенә шигырь багышлаган: «Үпкәләми үз баласына, буш кул белән кайтса да»

Татарстанның халык артисты, юморист Җәвит Шакиров социаль челтәрдәге сәхифәсендә еш кына үз әнисен һәм, әнисе вафат булганнан соң, үстергән әнисен дә искә ала. Аларга шигырьләр багышлый.

«Бүген таң белән уянып язган шигырем. Әле күптән түгел генә авылга кайтып, әнкәйнең хәлен белеп килдек. Барысы да яхшы. Аллаһка шөкер. Күңел дигәнең, еракта яшәгәнгәме, барыбер тыныч түгел. Телефоннан сөйләшү – бер, ә инде нигезгә кайтып, рәхәтләнеп күзгә-күз карашып сөйләшеп утыру – икенче инде.

Әниләрне берни белән дә шаккатырып булмый. Без үзебез алар өчен зур бүләк», – дип язган ул.

«Әниләр

Кайтыр булсак әни яннарына,

Дөнья бетереп бүләк эзлибез.

Алар өчен баладан да тәмле,

Затлы бүләк югын белмибез.

Әнидән дә якын, кадерлерәк

Кеше бармы икән ул дөньяда?

Әллә ниләр эшлисе килә.

«Балам»! – диеп әйтеп куйса да.

Кояш кебек җылы, кайнар,

Әниләрнең генә кочагы.

Алар барда гына якты, нурлы

Нигез, йортыбызның учагы.

Нинди генә чагы булса да,

Көтеп гомерләре узса да.

Алар аны безгә сиздерми,

Бит очларын яшьләр юса да...

Әни – әни инде ул,

Нәрсә генә дисәң дә...

Үпкәләми үз баласына,

Буш кул белән кайтып керсәң дә!»