Никарагуада автобус авариягә очраган. Шуннан соң салондагы пассажирларга бал кортлары һөҗүм иткән. Бу турыда «Вести» каналы хәбәр итә.
TN8 каналы белешмәсе буенча, бал кортлары чаккан 6 кеше үлгән. Автобус Ла-Рикуга бара торган булган.
8 майда Сан-Себастьян-де-Яли муниципалитетында 25 кеше утырган автобус юл кырыена чыга һәм чокырга төшеп китә.
Әлеге чокырда бик күп умарталар урнаштырылган. Автобус берничә умартаның өстенә ауган. Шуннан соң бал кортлары автобустан чыккан кешеләргә һөҗүм иткән.
Һәлак булган алты кеше арасында 8 яшьлек кыз бала, 84 яшьлек әби дә бар. Тагын 17 кешене хастаханәгә китергәннәр, диелә хәбәрдә.