Авариядә үлгән Диана Сәфәрованың дусты: «Минем үлгәнемне ишетсәгез, ник икәнен аңларсыз»
Әнвәр Нургалиевның туганы, 3 бала анасы, авариягә эләгеп һәлак булган Диана Сәфәрова эше буенча тикшерү бара. 23 октябрь көнне беренче суд утырышы булачак. Соңгы вакытта гаепләнүче як тарафыннан янаулар башланган. Бу хакта Диананың якын дусты Айгөл Халитова сөйләгән видеоны «Татар афиша» төркеменә куйганнар.
«Бүген Диана эше белән шөгыльләнүче адвокатка шалтыраттылар. Аңа бу эштән баш тартырга, судка килмәскә кушалар. Әгәр килсә, аягын сындыру белән яныйлар. Миңа да шалтыраттылар: социаль челтәрләрдә сүзләремне үлчәп сөйләргә киңәш иттеләр. Юкса, ахыры начар бетәчәк икән. Нәрсә әйтим, минем үлгәнемне ишетсәгез, ник икәнен аңларсыз инде», – дип сөйләгән Айгөл.
