Авариядә тимер өеменә әверелгән кроссоверда әтисе, әнисе һәм сабый бала һәлак булган
Зур тизлектә бара торган Mazda CX-5 килеп бәрелгәч, «Камаз» машинасы да ауган.
Рязань өлкәсендә коточкыч авариядә әтисе, әнисе һәм 2 яшьлек сабый һәлак булган. Алар Волгоградтан Мәскәүгә барырга чыккан булган. Фаҗига урынында төшерелгән кадрларны «Вести» каналы күрсәтте.
Юл һәлакәте 18 августта иртәнге җиденче ярты тирәсендә була. Якынча версия буенча, Mazda CX-5 машинасы белән идарә итүче 32 яшьле ир-ат зур тизлектә бара. Автомобиль каршы як полосага чыга һәм «Камаз» машинасына килеп керә. Бәрелү бик көчле була. Хәтта йөк машинасы да ян ягына ава.
Видео кадрларыннан күренгәнчә, кроссовер тимер-томыр өеменә әверелеп калган. Машина йөртүче ир-ат, аның 28 яшьлек хатыны һәм 2 яшьлек улына исән калу өчен бер мөмкинлек тә булмаган, диелә бу хәбәрдә.
Хәзерге вакытта йөртүченең шундый фаҗигагә китергән гамәленең сәбәпләрен тикшерүчеләр ачыклый.
Авария урыныннан фотолар Эчке эшләр министрлыгы сайтында чыкты.
