Аургазы районында көтүчене нәсел үгезе имгәтеп бетергән
58 яшьлек ир-атның берничә кабыргасы сынган.
Башкортстанның Аургазы районында 58 яшьлек көтүче ир-атны үгез сөзгән. Бәхетсезлек очрагы «Дуслык» авыл хуҗалыгы кооперативында булган. Бу турыда «Башинформ» хәбәр итте.
Июнь азагында көтүчеләр терлекләрне табигатькә алып чыга. Гадәттә алар атларга атланып йөри. Ләкин тау итәге бик текә булу сәбәпле, бу юлы көтүчеләр мопедлар белән чыга.
«Алар хайваннарны су эчерергә җәяүләп бара. Бу урында сулыкка төшү юлы текә була. Кире өскә күтәрелгән чакта, хайваннар кайтырга теләми, аларны чыбыркы белән куаларга туры килә. Бер мизгелдә нәсел үгезе кисәк кенә борыла һәм көтүчегә һөҗүм итә. Көтүче аны чыбыркы белән генә куып җибәрә алмый, ә махсус таягы булмый», — дип хәбәр итә Республиканың дәүләт хезмәт инспекциясе матбугат хезмәте.
Үгезне башка көтүче куып җибәрә. Имгәнгән 58 яшьлек ир-атны Стәрлетамак хастаханәсенә озаталар. Аның берничә кабыргасы сынган.
Хезмәт инспекциясе тикшерү нәтиҗәсе буенча, биредә хезмәт дисциплинасы һәм эш процессын оештыру тәртибе бозылган. Эш бирүчегә штраф салганнар.