Саратов суды 35 яшьлек ир-атны 19 елга ирегеннән мәхрүм итте. Ул әтисе белән әнисен үтереп, мәетләрен тураклаган, аннары шәһәр читенә илтеп ташларга җыенган. Бу турыда прокуратурага сылтама белән «Вести» каналы хәбәр итте.
Җинаять 2022 елның 7 мартына каршы төндә була. Ир-ат 56 яшьлек атасы белән талаша, аны кыйный, аннары буып үтерә. Шуннан соң ул йоклап ята торган анасын да үтерә. Ир-ат атасы белән анасының мәетләрен балконга чыгара һәм алар биредә бер ай чамасы ята. Шул вакытта эчендә ул туганнарының мәетләрен кул пычкысы белән кискәли, мәетләрне өлешләп яшермәкче була.
Ир белән хатын юкка чыккач, туганнары борчыла башлый. Аларның улыннан сораштыралар, аңлаешлы гына җавап ала алмагач, полициягә мөрәҗәгать итәләр. 10 апрельдә аларның фатирына полиция килә һәм балконда туракланган мәетләрне табалар.
Җинаятьче башта анасын атасы буып үтерде дип сөйли. Имеш, анасын үтергән өчен, ул атасын үтергән. Ләкин бераздан бу кеше атасы белән анасын үтерүен таный. Ул аларга күптән үпкәләп йөргән булган, диелә хәбәрдә.