13 июньдә Сызрань шәһәре янында авариядә бер гаилә кешеләре үлеп беткән. Бу турыда «Маленькая Сызрань» басмасы яза.
Алар Энгельс шәһәрендә яшәгән. Әтисе, әнисе, ике нәни кызлары һәм көтеп алынган кече уллары – гел бергә булган.
Танышлары сүзләренчә, алар бер дә аерылышып тормый. «Әниләре бик кайгыртучан, кызлары пөхтә, матур киенгән, чәчләре үрелгән. Әле бит кулында күкрәк баласы да бар», – ди алар.
Отпуск вакытында гаилә 6 яшьлек олы кызларының туган көнен бәйрәм итәргә җыена. Алар Сызрань янындагы турбазага бара.
Якынча версия буенча, «Scania» фурасын йөртүче тизлеген арттыра һәм «Renault Logan» машинасына барып бәрелә. Рульдә әтиләре – 33 яшьлек ир-ат була. Аннары җиңел автомобиль алдагы йөк машинасына барып керә. Фуралар арасында кысылып калган машина тимер-томыр өеменә әверелә.
Әтисе, әнисе, 6 яшьлек кыз, кече уллары – 1,2 яшьлек малай урында ук үлә. 4 яшьлек кызлары гына исән кала. Хәзер ул Самарада дәвалана. Әбиләре булуы билгеле, диелә хәбәрдә.
