Хабаровск шәһәрендә яшәүче ир-ат хатынын үтереп, елгага ыргыткан. Балаларга әниләренең үлеме турында әйтмәгән. «Комсомольская правда» шул хакта яза.
Тикшерү версиясе буенча, ир хатынын үтерә, мәетен арбага салып, елгага алып барып ыргыта. Әниләре югалгач, уллары чаң суга башлый, алар аталарыннан сорый. «Күрмәдем», – ди әти кеше. Соңрак мәетне мәрхүмә хатынның кече улы таба.
49 яшьлек ир-ат хатыны белән бергә шәхси йортта тора. Биредә һәркем бер-берсен белә диярлек. Әлеге гаилә турында күрше-күлән «салгалыйлар» дигәннән башка берни әйтә алмый. Ләкин ир белән хатын икесе дә бер-берсенең эчеп йөрүен яратмый.
2024 елның апрелендә ир белән хатын чираттагы тапкыр табын корып утыра. Тикшерүчеләр белешмәсе буенча, алар бер-берсен хәмер яраткан өчен битәрли башлый. Аннары эш сугышка күчә – ир хатынын кыйный: башына, муенына, битенә суга. Хатын аңын югалта. Аннары ир хатынны буып үтергән, дип фаразлыйлар. Ул гаебен танырга ашыкмый, эзен яшерергә маташа.
Ир хатынының мәетен арбага салып, өйдән берничә метр ераклыкта гына ага торган елгага илтә. Аннары өенә кайтып, гадәттәгечә яши. Ике улы чаң суга башлагач, каядыр китеп югалганын белмәвен әйтә.
Кече улы елгада анасының мәетен таба. Ирне тоткарлыйлар, җинаять эше ачыла. Аны 8 елга ирегеннән мәхрүм иткәннәр, диелә хәбәрдә.