Ир белән хатын, Чаллыда өч кыз баланы әбиләре белән ташлап калдырып, чит илгә китеп барганнар. Алар барысы да Россия гражданнары түгел. Бу турыда «Челнинские известия» Чаллы судына сылтама белән хәбәр итте.
Чаллыда яшәүче хатын бу балаларны ата-анасы ташлап калдыруын исбатлаган.
Суд материаллары буенча, бу хатын танышының өч оныгын ялгызы гына тәрбияләвен сөйли. Кызларга 3, 4 һәм 6 яшь. Аларның ата-анасы һәм өлкән апалары Урта Азиядә туган, калганнары Чаллыда туган.
Ир белән хатын Чаллыга акча эшләргә килә, әби кеше оныкларын карап тора. Гаиләдә бар да тыныч кына барганда, әти белән әни кеше китәргә карар кыла. Ләкин алар туганнарын үзләре белән алмый. Ике елдан артык элек алар Брянск шәһәре аша чит илгә китә, һәм әлегә кадәр аларны эзләү игълан ителгән.
Әби кешенең дә Россия гражданлыгы юк, аңа оныклары өчен социаль түләүләр бирелми, ике нәни кыз балалар бакчасына йөри алмый. Олы кызны гына мәктәпкә урнаштыра алганнар.
Суд әбигә даими опека, социаль гарантияләр һәм Россия территориясендә яшәүне рәсмиләштерү карары кабул иткән.