Оборона министрлыгы Украина әсирлегеннән 248 хәрби кайтуы хакында хәбәр итә. Бу – хәрби конфликт башланганнан бирле иң күп сандагы әсирләрне алышу очрагы.
Соңгы тапкыр әсирләрне алмашу апрель аенда булган иде, шуннан соң бу процесс тукталды. Бу юлы әсирләрне алмашу Берләшкән Гарәп әмирлекләре арадашлыгында башкарылган.
Барлык әсирләр дә Белгород өлкәсенә чыгарылган, шуннан алар самолет белән Оборона министрлыгының дәвалану урыннарына – госпитальләргә, реабилитация үзәкләренә җибәрелгән.
Әсирләрне алмашу процессында даими эш алып барган депутат Шамсаил Саралиев әйтүенчә, алмашу 173кә 173 схемасы буенча узган.
Россиянең 75 хәрбие алмашмыйча кайтарылган – ягъни, алар өчен Украина әсирләрен азат итмәгәннәр. Шамсаил Саралиев каналында шушы 75 кешенең исемлеген биргән. Бу мәгълүмат дөрес булса, анда Абсалямов Р.Р., Байтимиров Р.С., Гатауллин Д.М., Хисамутдинов Н.Р., Шарифуллин А.И. кебек татарныкы булуы ихтимал исем-фамилияләре бар.
Әсирлектән кайтарылган хәрбиләр Оборона министрлыгына һәм Путинга рәхмәт әйтә. «Хәзер ашыйбыз!» – ди берсе. «Биш сәгатьтән мин өйдә булам», – дип куана тагын берсе.
Украина ягы да әсирләрнең кайтуы турында видео урнаштырды. Алар 230 әсирнең кайтуы хакында хәбәр итә.