Сәламәтлек өчен файдалы ризык пешергәндә нинди май куллану дөрес икәнен табиб-гастроэнтеролог Наталья Морозова сөйләгән. Бу турыда «МИР» телеканалы хәбәр итте.
Белгеч сүзләренчә, кыздыру өчен кайнау температурасы югарырак булган май кулланырга кирәк. Мәсәлән, рафинирланган үсемлек мае, кокос яки зәйтүн мае.
Заправка, соуслар өчен салкын кысу юлы белән ясалган, рафинирланмаган май кулланырга кирәк. Мәсәлән, зәйтүн, көнҗет яки җитен мае.
Табиб сүзләренчә, бөтен майның да файдалы үзлекләре дә, зыянлы яклары да була. Беренче чиратта, бу – шактый югары калорияле продукт. Атланмайның калориялелеге 100 граммда 650-800 ккал. Төрле үсемлек майларының калориялелеге 100 граммга 900 ккал чамасы.
«Теләсә-нинди май – һәр кешегә кирәк булган майлар чыганагы. Көнҗет, кокос, соя мае туендырылган майлы кислоталарга бай. Алар антисептик үзлеккә ия, гөмбәчекләр һәм патоген микрофлора үсешен чикли. Ләкин туендырылган майлы кислоталарны артык куллану «начар» холестерин күләменә йогынты ясарга мөмкин һәм симезлек, йөрәк-кан тамырлары патологияләре, шикәр диабеты барлыкка килү куркынычы факторы булып санала», – ди белгеч.