Артур Хәсәнов, махсус операциядән кайткач, Ришат Төхвәтуллин төркемендә эшләргә җыена
Хәрби өйрәнүләр вакытында «Киек каз юллары» җырын башкарып танылган Башкортстан егете Артур Хәсәновның инде күптәннән күренгәне юк иде. Аның турында «югалттык» дип язучылар да булгалады. Артур өчен борчылып торучылар тынычлана ала – җырчы егет сау-сәламәт, хәзер дә хәрби операциядә. Шактый җырчылар белән элемтә тотучы Артур бүген Ришат Төхвәтуллин белән сөйләшкән. Ришат хәрби белән аралашкан видеосын сторисларына куйды. Артур Ришат Төхвәтуллинга шаяртып кына: « Синең төркемдә берәр урын юкмы анда, брат?» – дип тә мөрәҗәгать иткән.
«Табарбыз, брат. Иң мөһиме – исән кайт», – дип сүз биргән аңа җырчы.
