«Атказанмаган» дип җырлап йөргән Илсөя Бәдретдинова юбилей концертына ныклап әзерләнә. Быел җырчының иҗатына 20 ел була һәм ул инде Татарстанның атказанган җырчысы да булды.
Җырчы социаль челтәрдәге шәхси битенә яңа концертка реклама буларак видео урнаштырган һәм «20 ел инде се...» дип тә язган.
Комментарий язучылар җырчы язып бетермәгән сүзне дә дәвам итеп караган. Аннары шигырь укырга яратучы артист Алмаз Мирзаянов комментариен ярты юлда өзеп, кабат баш ватарга мәҗбүр иткән.
«Кайсы гына артист тынычлап йоклар икән бүген?! Көчле килеп чыккан, вәт ку...» – дип язган да ул.
«Кычкырып көлеп җибәрдем. Аңлаганнар аңлар...» – дип җавап язган Илсөя.
Алмазның комментариесын һәр кеше үзенчә аңлаган. «Куандырдың димәкче идем», – дип тынычландырырга теләгән ул комментарийны дәвам итүчеләрне.
«Илсөя апа, бомба булачак», «Түземсезлек белән юбилей сезонын көтәбез», «Текә булачак», – дип язган концертка йөрергә яратучылар.