Шушы көннәрдә социаль челтәрләрдә мобилизацияләнгәннәрнең тагын бер видеосы пәйдә булды. Бу юлы Башкортостаннан китүчеләр җырчы Вәсилә Фаттахованың (мәрхүмә) бик популяр булган «Туган як» җырына биегәннәр.
Видеодан күренгәнчә, бер төркем ир-атлар кулларына әләмнәр тотып күңел ачканнар, җырчыга кушылып җырлаганнар. Татарча җыр башлангач, шатланышканнар. Аларның барысы да – күтәренке рухлы булып күренә.
Видеоны 60 меңнән артык кеше караган, биһисап күп комментарийлар язганнар. Күбесе егетләрнең исән-сау әйләнеп кайтуларын теләгән. «Әрни йөрәк, өзелә үзәк. Исән-сау булыгыз, җанкайлар. Якыннарыгызга түземлек», «Аллаһы Тәгалә һәрберегезне саклап йөртсен, һәрберегезгә исән-сау гаиләләрегезгә әйләнеп кайтырга насыйп итсә иде», «Җиңү белән кайтыгыз!», «Ой, егетләр, сезнең алдыгызда баш иябез. Без сезнең өчен һәрвакыт догада», «Малатсы! Курка-поса илдән чит җирләргә качып китү түгел инде менә бу!», «Уңышлар сезгә. Сак булыгыз, бер-берегезне саклагыз. Сугышта булган каһарман батырларыбызны, бабаларыбызны онытмагыз», – кебек хәер-фатихалы җылы комментарийлар килеп ирешкән.
«Салкын. Егетләр биеп җылыналар да, кәефләрен дә күтәрәләр булса кирәк, – дип фаразлаган берәү. – Җыр туган җир турында. Күңелгә тия...»;
«Йөрәк сыкрый... Бии-бии сугышка баруларына һич ышанып булмый», «Күңелгә рухи көч бирә, берләштерә торган шундый чараларны хуплыйм. Афәрин», «90нчы елгы балаларны берничек тә куркытып булмый. Батырлар алар. Безнең заман геройлары», – дип, мобилизацияләнгәннәрнең бу рәвешле күңел ачуларын хуплаучылар булган.
«Сез бит сугышка барасыз. Җиңгәч, бәйрәм итәрсез», – дип язып куючы да бар.
«Башкортлар – бик әйбәт халык. Луганск өлкәсеннән дә Уфага бик күпләр күчеп килде. Уфа аларны бик җылы каршы алды, торыр урын, ашарына – азык, кешелекле мөнәсәбәт бирде», – диюче дә бар.
Ә бер комментарий бигрәк тә игътибарны җәлеп итә, күңелгә үтеп керә, йөрәккә тия торган: өлешчә мобилизация кысаларында запастан хәрби хезмәткә Башкортстаннан китеп һәлак булучыларның исемлеген язганнар. Исемлектә 10 кеше теркәлгән. Унберенчесе... дип, күп нокталар куелган…