Яңавылда яшәүче ир-ат аркасына пычак кадалган килеш машинасына утырып хастаханәгә килгән

Башкортстанда яшәүче ир-ат, аркасына пычак кадалган килеш, машинасына утырып, хастаханәгә килү җаен тапкан. Бу турыда «Башинформ» хәбәр итте.

Яңавыл районы полициясенә табиблар шалтырата, алар аркасы яраланган ир-ат мөрәҗәгать итүен әйтә.

Полиция ачыклаганча, җинаятьтә бу ир-атның бергә яши торган 38 яшьлек хатынының катнашы була. Хатынны полиция бүлегенә алып киләләр, ул гаебен танып күрсәтмә бирә.

Башкортстан буенча Эчке эшләр министрлыгы белешмәсе буенча, бергә яши торган ир белән хатын авылдан киләләр һәм «салып» утыралар. Шул чакта аларның күптәнге бәхәсе аркасында талаш чыга. Хатын ирен көнли, акча җитмәү сәбәбе дә калкып чыга. 38 яшьлек хатын аш-су пычагын ала һәм арты белән борылган иренә кадый. 43 яшьлек ир-ат шок халәтендә урамга чыга, машинасына утыра һәм район хастаханәсенә китә. Аңа табиблар ярдәм күрсәтә.

Җинаять эше ачылган, диелә хәбәрдә.