Апас районында дүртенче һәм аннан соңгы бала тугач бер тапкыр бирелә торган түләү кертелә
2026 елда Апас муниципаль районында яңа муниципаль ярдәм чарасы гамәлгә кертеләчәк: дүртенче һәм аннан соңгы балалар туу уңаеннан бер тапкыр бирелә торган акчалата түләү. Ярдәмнең күләме 200 мең сум тәшкил итәчәк. Бу хакта «Вести-Татарстан» яза.
Әлеге түләүне Апас районында кимендә 1 ел даими рәвештә яшәүче хатын-кызлар ала алачак. Хәзерге вакытта әлеге карар проекты коррупциягә каршы экспертиза уза.
«Татарстан Республикасы Апас муниципаль районы бюджеты хисабына 2026 елда, мөрәҗәгать итү көненә кимендә 1 ел Апас районында даими яшәүче хатын-кызларга, дүртенче бала яки аннан соңгы балалар туу очрагында, 200 мең сум күләмендә бер тапкыр түләү билгеләргә», – диелә документта.
Әнисе вафат булган очракта, түләүне әтисе алу хокукына ия булачак. Әлеге түләүне рәсмиләштерү өчен, ата-аналарга Апас районы башкарма комитетының ЗАГС бүлегенә мөрәҗәгать итәргә кирәк.
