Аның әтисе миллионер, ә мин ятим үстем...
ВКонтакте сәхифәсендә утыручылар театр артисты Мәдинә Гайнуллинаның фәлсәфи соравына җавап эзләгән.
Әлмәт драма театры артисты Мәдинә Гайнуллина виртуаль дусларына бер фәлсәфи сорау биргән. «Бер такси йөртүче шәһәрнең танылган миллионерын өенә илтә. Миллионер нәкъ исәп буенча (счетчик буенча) түли. Таксист: «Кичә мин сезнең улыгызны илткән идем, ул миңа рәхмәт йөзеннән 100 доллар өстәп калдырды». Миллионер аңа: «Аның әтисе миллионер, ә мин ятим үстем!» — дигән.
Мораль: Үзе акча табу кыенлыгын белгән кеше генә байлык кадерен белә, диләр. Сез килешәсезме?» — дип сораган ул дусларыннан.
Интернет кулланучылар калдырган җаваплар да кызык.
«Мин бай кеше түгел, ләкин кешеләргә булыша алу (шул исәптән акчалата да) миңа рәхәтлек өсти, күңелем күтәрелә»;
«Үзеңнән үзе байлык түгел ул… Үз якыннарың белән бүлешә белгәндә генә акчалы капчыкта утырып торуның рәхәте була. Аннан байлык өстәлеп кайта дигән уйларым бар»;
«Үзем тапкан мал түгел, әти тапкан жәл түгел»;
«Акча бер букча,
Кадер-хөрмәт безнең учта
Бай булмасаң да
Байдан-бай, хөрмәтең бай булсын»;
«Атай малы - катай, дия торган иде әнкәй. Дөрестән дә, үзең тир түгеп тапмаган малның кадере булмый»;
«Тир түгеп, дөньяның бөтен авырлыкларын үз җилкәңдә татып тапкан байлык кадерле. Ятимгә булышучы булмагач, үзеңә тырышырга туры килә. Андыйлар эшләп тапканның кадерен дә белә», — дип язган берсе. «Әйе, дусларыбыз бар иде. Балалары кимсенеп, мохтаҗлыкта үстеләр, әтиләре эчкече булды. Олы тормыш юлын үз тырышлыклары белән башладылар, бик тырышып яшиләр. Әти-әнисенә ярдәм итәләр, акчаның кадерен беләләр», — дип тә килешкәннәр.
