Яшь җырчы Марат Яруллин Башкортстанның Бакалы районы Сакат авылында чыгыш ясаганда музыка сүнгән. Маратка микрофонсыз гына, үз тавышына җырларга туры килгән. Бактың исә, бу хәлнең сәбәпчесе – җырчы Әнвәр Нургалиев икән. Әлеге көтелмәгән вакыйга турында Марат Телеграм каналында болай дип язган:
«Сакат авылында кызык хәл булды. Мин җырлаган вакытта кинәт аппарат сүнеп китте. Бактың исә, Әнвәр абый Нургалиев сәхнә артында үзенең «мощный» үтүге белән чәчәкле күлмәген үтүкли башлаган. Абыйның үтүгенә аппарат чыдамады. Ул күлмәген үтүкләп бетергәнче, микрофонсыз җырлап алдык.
Абый, рәхмәт, күптән микрофонсыз җырлаганым юк иде», – дип көлгән Марат.
«Менә бит, алай да ярыймени!», «Бу бик кызык хәл түгел, кәнишне. Синең урында Әнвәр үзе булган булса, белмим...», «Понт» инде бу, бөтен җырчылар шулай эшли хәзер», «Аның каравы, үзең җырлаганың расладың», «Тавышы йомшак кына, энергетикасы көчле Маратның!», «Маладис син», «Аппаратсыз да булдырасың», – дип язганнар Маратның Телеграм-дуслары.
«Минем үтүк шундый ул, Марат туганым, весь яндыра», – дигән көлгән, смайликларны мулдан тезеп, Әнвәр Нургалиев үзе.
«Аңладым инде мин», – дип елмайган Марат та.