Әнвәр Нургалиев Уфадагы артистларның бер-берсе концертларына йөрмәве хакында әйтеп, Татарстан артистларның үзара дустана мөнәсәбәттә булуына басым ясаган. Ул бу хакта «Туган тел» теленкалындагы «Сер итеп» тапшыруында сөйли.
«Без Казанда да концерт куябыз, Уфада да. Казандамы без, Түбән Камадамы, Әлмәттәме – һичшиксез берәрсе килә. Алар: «Әнвәр, билетың юкмы?» – дип тә сорап тормыйлар, баралар да алалар. Булмаса, каяндыр табалар. Бүген Уфада бишенче көн концерт. Биредә 4 көн буе бер артист булмады, бүген дә берәр Уфадагы артист концертыма килер дип уйламыйм.
Мин үсеш өчен кайгырам. Безнең эстраданың да үсүен, күтәрелүен теләр идем. Мине аларның килеп мактавы кирәкми. Үсәсе килгән кеше килә дә карый концертны. Алар, бәлки, башкаларга йөриләрдер, сүз дә юк, тик төрле артистларга йөрергә кирәк», – дип үз фикерен белдергән җырчы.