Әнвәр Нургалиев февраль аенда Казанда узачак концертларына тамашачыларын кызыклы рәвештә чакырырга булган.
Җырчы социаль челтәрләрдә урнаштырган ролик көтелмәгән кадрдан башлана: Нургалиев көндәлек киемнәрдән, автомобильгә бәйләп куелган килеш басып тора. Машина кузгалып китү белән белән тамашачылары чып-чын могҗиза күрәләр. Фея тылсымлы таягы белән Золушканы балга киендергән кебек, машина бауны тартып алып китү белән җырчының образы үзгәрә. Мизгел эчендә аның көндәлектә кия торган киеме ап-ак сәхнә костюмы белән алышына.
Язылучылары Әнвәр Нургалиевның креативлыгын бәяләп: «Сезне бигрәк креатив итеп чишендергәннәр», «Креативлык өчен «5»ле сезгә», «Әнвәр абзыйны Пензага алып киттеләр», «Моны караганда бер мин генә борчылып утырдыммы ул?», «Искиткеч эффект», «Машина алып китә дип куркып карап утырдым», – дип язалар.