Чаллыда аңын югалтып егылган әнисен үлемнән коткарып калган 5 яшьлек малай турында «Беренче канал»да сөйләгәннәр. Бу турыда «Челнинские известия» яза.
«Хәерле иртә» тапшыруында 5 яшьлек Саша турында сөйлиләр. Әни кеше кисәк кенә аңын югалтып егыла. Бала «ашыгыч ярдәм»гә шалтырата. Аның белән диспетчер Любовь Шугаива сөйләшә.
Бала елый: «Әнинең хәле китте, ул егылды, сөйләшә алмый», – ди. Белгеч адресны сораша. Тик сабый «алсу төсле йорт, икенче кат» дип кенә әйтә белә.
- «Ал төсле өй, икенче кат». Чаллыда нәни малай «ашыгыч ярдәм» чакырып, әнисен коткарган, дип язган идек.
Озак еллар линиядә эшләгән Любовь Шугаива баладан сораштырып, адресны ачыклый. «Син безгә ишекне ачарсың яме», – дип баланы кисәтеп куя. «Әйе, мин ача беләм», – ди Саша.
Соңрак ачыкланганча, баланың анасының кискен авыруы башланган, табиблар килгәндә дә ул аңсыз булган. Фельдшерлар ярдәм күрсәткәч, аны хастаханәгә салганнар. Әнисен коткарган Саша исә өйдә әбисе белән калып торган, диелә хәбәрдә.
