Мәскәү өлкәсенең Балашиха шәһәрендә югалган 3 яшьлек кыз баланы эзлиләр. Бу турыда Тикшерү комитетына сылтама белән «Вести» каналы хәбәр итте.
Бала югалу турында 19 апрельдә билгеле була. Аңа кадәр кызның 39 яшьлек әнисенең мәетен подъезд түбәсендә табалар. Мәрхүмәнең гәүдәсендә биеклектән егылып төшкәндә барлыкка килгән травмалар була.
Югалган бала Полина исемле, алар әнисе белән икесе генә яшәгән.
Фатирны, өй яннарын, канализация коллекторларын, якындагы елга буйларын карап чыкканнар, тик баланы таба алмаганнар.
Матбугат чаралары белешмәсе буенча, бала әнисе белән бергә подъездга кергән. Моны видеокүзәтү камерасы төшереп торган. Аннары баланың өйдән чыгуы теркәлмәгән, диелә хәбәрдә.
Соңрак РЕН ТВ хәбәр иткәнчә, баланың мәетен тапканнар. Ул подъезд түбәсе астында булган. Бу турыда хәбәрне Тикшерү комитеты да раслаган.