Уфада яшәүче хатын 10 яшьлек кызын 1 атнадан артык салкын тиюдән дәвалаган, ул баланың җил чәчәге (ветрянка) вирусыннан авыруын белмәгән. Өй шартларында дәвалаудан соң кыз үлгән, дип хәбәр итә «Mash» каналы.
Телеграм-каналдагы мәгълүматлар буенча, 23 гыйнварда кызның температурасы күтәрелә, һәм көчле ютәл башлана. Аның 38 яшьлек әнисе кызына салкын тигән дип уйлый, шуңа күрә ул аны үзе генә дәваларга була. 8 көн дәвамында ана баласына антибиотиклар, ютәлдән сироплар бирә, шулай ук вакыт-вакыт ингаляцияләр ясый.
Әмма 31 гыйнварда кызчыкның хәле начарлана. Хастаханәдә табиблар баланы хастаханәгә салырга куша, әмма кыз аларны үзен яхшы хис итүенә ышандыра. Әнисе, кызын тыңлап, өенә кайта, анда аңа кабат дарулар бирә.
Әмма икенче көнне баланың хәле тагын да начарлана, һәм аңа «ашыгыч ярдәм» чакыралар. Чакыруга килгән табиблар кызга укол ясап, ашыгыч рәвештә хастаханәгә ятарга кирәген таләп итәләр, әмма яшь пациент юлда барганда вафат була.
Соңрак кызда җил чәчәге чире булуы ачыкланган. Әгәр аңа вакытында амбулатор дәвалау билгеләнсә, ул үлмәгән булыр иде, дип язалар. Хәзерге вакытта полиция хезмәткәрләре баланың әнисенә бәйле тикшерү алып бара.