Первоуральскида Татьяна исемле хатын-кыз 11 яшьлек улын чылбыр белән бәйләп куйган һәм даими рәвештә кыйнаган. Бу хакта 18 ноябрьдә Свердловск өлкәсе судлары телеграм-каналы хәбәр итте, дип яза РЕН ТВ.
«Суд аны гаепле дип таныды һәм 3 ел да 6 айга ирегеннән мәхрүм итү карары чыгарды, ул гомуми режимлы колониягә озатыла», – диелә хәбәрдә.
Тикшерү версиясе буенча, Татьяна 2023 елның ноябрендә малаен чылбыр белән бәйләп куйган. Ә 2025 елның февралендә ул баланы агач уклау һәм күн каеш белән кыйный башлаган һәм аны колакларыннан сөйрәп йөрткән.
Җинаятьтә гаепләнүче хатын-кыз гаебен тулысынча таныган. Прокуратура зыян күргән яшүсмер файдасына мораль зыян түләтүне сораган, суд моны өлешчә канәгатьләндергән, диелә хәбәрдә.
