«Әни дә килә, чәчен буятабыз, күлмәк, кроссовка»: Илнат Фәрхуллин зур бәйрәмгә әзерләнә

«Казан егетләре» төркеменең элеккеге солисты Илнат Фәрхуллин 35 яшьлеген тамашачылары белән үткәрергә җыена. Шул уңайдан ул социаль челтәрдәге сәхифәсенә видео яздырып куйган.

«35 яшьлек юбилеем уңаеннан Казанда концерт куям. Аны сезнең белән үткәрәсем килә, чөнки минем беркайчан да алай үткәргәнем юк. «Ник минем белән үткәрмисең?» – ди әни. Ел да синең белән үткәреп булмый бит инде, дим. Әмма әни концертта булачак. Әнинең чәчен буятачакбыз, матур күлмәк, кроссовка яки кедалар киячәк», – дип кызыксындыра җырчы.