2025 елда беренче бала өчен ана капиталына (690 300 сум) Казанда икенчел базарда нибары 3,5 кв. метр торак сатып алырга мөмкин. Бу хакта «Татмедиа» телеграм-каналында хәбәр ителә.
Бу – Россиянең зур шәһәрләре арасында иң түбән күрсәткечләрнең берсе. Апрельдә Казанда квадрат метрның уртача бәясе 197 228 сум тәшкил иткән, 1 ел эчендә 7,4 процентка арткан.
Яр Чаллыда ана капиталы түләвенә 6 кв. метрны 115 300 сумнан алырга мөмкин. Бу, узган ел белән чагыштырганда, 0,1 кв. метрга кимрәк. Биредә бәяләр үсеше 11,9 процент тәшкил иткән.