Ана белән ун айлык сабыйны аю ботарлап ташлаган
Кышкы йокыдан уянып, кешеләргә һөҗүм иткән ерткычны гаилә башлыгы атып үтергән.
Канаданың Юкона дигән торак пунктында коточкыч вакыйга булган. Гризли аюы кышкы йокысын бүлеп, өненнән чыккан. Ерткыч 37 яшьлек хатынны һәм аның ун айлык баласын ботарлап ташлаган. Бу турыда «Вести» каналы хәбәр итте.
Фаҗига вакытында әти кеше өйдә булмый. Гермунд Ресхольт исемле тәҗрибәле аучы өенә кайтып килешли аю күреп ала. Аучы ерткычны атып үтерә. Шуннан соң йорт бусагасына килеп җитә һәм коточкыч хәл күрә: аның хатынын һәм күкрәк баласын аю ботарлап ташлаган.
СВС каналы хәбәр иткәнчә, бу гаилә әлеге урынга өч ай элек килеп урнаша. Валери исемле хатын — француз теле укытучысы, ул декрет ялында була. Гаилә цивилизациядән читтә яшәп торырга ниятләп, бирегә килеп урнаша.
Валери баласы белән урамда йөргән булуы ихтимал. Шул вакытта аю килеп чыккан. Хатын ерткычтан качмакчы була, өенә таба йөгерә. Ләкин аю бала белән хатынны куып җитә һәм ботарлап ташлый, дип фаразлыйлар.
Валери бик актив хатын була. Ул кешеләр белән аралашырга ярата, хайваннарга да яхшы карашта була.
Канаданың Әйләнә-тирәлек министрлыгы гризли аюының ни өчен кышкы йокыдан бүленеп уянганлыгын ачыклый. Ерткычның кешеләргә һөҗүм итүе сәбәпләрен, аңларга тырышалар, диелгән әлеге хәбәрдә.