Әмирлекләрдә фаҗигале үлгән Чаллы кешесе: «Диңгездә үләргә телим, аның дулкыннарында»

Чаллыда яшәүче 62 яшьлек хатын-кыз Гарәп Әмирлекләрендә фаҗигале үлгән. Ул диңгездә үләргә теләвен әйтә торган булган. Бу турыда «Челнинские известия» яза.

Курортта үлгән бу хатын дус кызларына уйларын сөйләгән. Ул диңгезне бик ярата, ялга китәсе көнен зарыгып көтә. «Диңгездә үләргә телим, аның дулкыннарында», – дип әйтә. Аның сүзләренчә, «бу – иң яхшы үлем».

Фаҗига 2 атна чамасы элек була. Пенсионер хатын беренче тапкыр диңгезгә бара, һәм ул соңгысы була. Су коенган чакта зур дулкын аны аягыннан бәреп ега. Ул тончыга, бата башлый – барысын да дуслары күреп тора.

Коткаручылар аны ярга алып чыгып, беренче ярдәм күрсәтә, хастаханәгә алып китәләр, тик ул аңына килмичә үлә, диелә хәбәрдә.