Галимнәр кул киптергечләрнең зыяны турында кисәтте. Бу турыда РИА Новости хәбәр итә.
Җәмәгать бәдрәфләренә куелган кул киптергечләр – бактерияләр үрчи торган урын, алар кеше өчен дә куркыныч. Эксперимент вакытында микробиологлар туклыклы тирәлек салынган махсус савыт – Петри чокырларын өч категориягә бүлә. Беренчесен ачык һавада калдыралар. Икенчесен кул киптергеч астына куялар. Өченчесен һава аз гына килә торган вентилятор кырыена урнаштыралар.
Эксперимент күрсәткәнчә, нәкъ менә кул киптергечтән килгән һава агымы бактерияләрне күбрәк тарата.
Кул киптергеч астына куелган савытта бактерияләрнең 18 дән 60 ка кадәр колониясе табыла. Вентилятор янындагысында 5 тән 12 гә кадәр була. Ачык һавада 1 колониядән дә кимрәк бактерия үрчи.
Әлеге бактерияләр арасында «Bacillus subtilis» дип аталганы туфракта була, ул кеше өчен куркыныч түгел. Ләкин галимнәр кисәткәнчә, кул киптергечләр куркынычрак микроблар да таратырга мөмкин, диелә хәбәрдә.