Гөлназ Асаевага әнисеннән бик шәп кенә «эләккән». Җырчы үзенең сторисларында ире Вильданны артык коры булуы өчен ачуланган. «Сүгеп барам әле менә Вильданны. Аз гына минем турыда уйларга кирәк бит инде, хатын-кызны кайгыртырга өйрәнергә кирәк... Әле генә таеп егыла яздым. Ә бу кулларын кесәсенә тыккан да китеп бара. Ичмасам, кулыңны бирсәң, минәйтәм. Абынып егыла күрмә, дип әйт инде, бер дә булмаса. Кеше ирләре ничек матур кыланалардыр инде. Минекеннән юк инде андый әйбер.
Үзен яратам инде, барыбер. Бәлки «сухарь» булганына күрә яратамдыр да әле, әйеме?» – дип сөйләгән Гөлназ.
Әлеге сторисларны, беренче булып, аны иң төп «хейтеры» – әнисе, җырчы Лилия Биктимерова тотып алган.
«Бигрәк инде син, Гөлназ! Нигә алай язасың. Синең менә, романтик түгел, дип әйтәсең килгән. Ә мин «сухарь» дип әйткәч, бер җебегән, бер юньсез ир, дип әйтәсең дип уйладым. Алып ыргыт, нәрсә кияүдән көләсең!» – дип тавышлы смс калдырган ул кызына.
Шунысын да билгеләп үтәргә кирәк, Лилия Биктимерова киявен баштарак бөтенләй ошатмый иде. «Вильдан белән очрашуыма әти-әниләр бик нык каршы булды», – дип, бу турыда Гөлназ үзе күп кенә интервьюларында сөйләде.
