Чувашиянең Алатышево авылында яшәүче 80 яшьлек хатын-кыз урманга гөмбә дип чыгып киткән һәм 2 көн адашып йөргән. Бу турыда төбәк буенча Эчке эшләр министрлыгы телеграм-каналында язалар.
Аны полиция хезмәткәрләре һәм волонтерлар тапкан.
Полиция белешмәсе буенча, әби 7 сентябрьдә гөмбә җыярга урманга киткән һәм адашкан.
Шунда ук эзләү чаралары оештырыла, волонтерлар да әлеге эшкә кушыла. Пенсионер белән вакыт-вакыт телефоннан элемтәгә кереп торалар, ул, авыр хәлдә булуга карамастан, үзен тыныч тота.
9 сентябрь иртәсендә әбине авылдан берничә километр ераклыкта табалар. Әби адашып йөрсә дә, табышын ташламаган, аның арбасында һәм аркасына элгән сумкасында гөмбәләр була.
Әбине өенә кайтарганнар, аңа медицина ярдәме кирәк булмаган.