Алтынчы сыйныфта укучы малай бер кызга антисептик сибеп ут төрткән
Такта каршына чыккан малай күрмәсен өчен, кыз китабын ябып куйган булган.
Самара өлкәсендәге бер мәктәптә алтынчы сыйныфта укучы малай бер кызга антисептик сипкән һәм ут төртеп яндырган. Бу турыда биредәге матбугат чаралары язды.
Үсмер инглиз теленнән өй эшен әзерләп килми. Аны укытучы такта каршына чыгара. Малай шул чакта бер кыздан ярдәм көтә, аның китабыннан дөрес җавапны карап алмакчы була. Тик кыз китапны ябып куя.
Укучы малай ярдәм итмәгән сыйныфташыннан үч алу планын кора. Ул сыйныфташын дәрестән кайтып барышлый сагалап тора. Кыз мәктәптән чыккач, малай арттан йөгереп килә һәм кызның капюшонына антисептик сиптерә, аннары шырпы сызып ут төртә.
Бәхеткә, якында кешеләр була, алар бергәләп утны тиз генә сүндерә.
Анасы сүзләренчә, кызның хәле нормада, тик ул үзе генә урамга чыгарга курка.
