Җырчы Алсу Фазлыева – челтәрле бизнес белән шөгыльләнүче артистларның берсе. Инде шактый еллар ул әйләнә-тирәдәгеләрен, виртуаль дусларын билгеле бер челтәрле бизнеска теркәлеп, акча эшләргә чакыра. Хатын-кызларны ирләренә дә ышанмаска, алардан бәйсез булып яшәргә өйрәнергә өнди. Алсуның социаль челтәрдәге соңгы посты да шул хакта.
Кичә миңа бер хатын-кыз язган иде… Ул бары тик үзе өчен генә теркәлергә теләве, башкаларга бөтенләй сата белмәве һәм, гомумән, ире күп акча эшләве турында язды... Мондый сүзләрдән соң миндә – пауза...
Шулай диючеләр өчен мин шат кына, билгеле. Ләкин без иртәгәсе көнне нәрсә буласын белмибез бит, иртәгә безне ни көтә?! Теләсә нәрсә булырга мөмкин: ирең эшсез калырга, чирләп китәргә, гомумән, мөнәсәбәтләрегез үзгәрергә. Бу – тормыш!
Хатын-кыз нинди дә булса эш, хобби белән мавыга икән, өйдә – тынычлык, комфорт. Чөнки ул үзен кызыксындырган эш эшли, шул ук вакытта керем дә ала. Иренә өметләнеп утырмый. Гомумән, ирләренең җилкәләрендә утырган хатын-кызларны бөтенләй аңламыйм! Ир-атларга да булышырга кирәк, дип саныйм. Алар да тынычрак булсын өчен. Гадәти көндәлек тормышта бу турыда уйланылмый, берәр нәрсә килеп чыкса гына шул. Ә бит соң булуы да бар.
Әз-әзләп эшләргә кирәк. Бизнеста да нәкъ менә лидер булырга димәгән. Әкрен-әкрен генә тәҗрибә тупларга, күнекмәләр өйрәнергә, шул ук вакытта, матуррак, яшьрәк күренә башларга мөмкин. Иң мөһиме – өйдә барысы да тыныч. Минем дә ирем акчаны яхшы эшли. Ләкин миңа үземә эшләргә, күңелмә якын хобби белән мавыгырга ошый. Үземне кирәк булып тою ошый.
Хәзер миңа: «Алдан юрама», – дип язарга мөмкиннәр. Юк, бу – гадәти киңәш, ярдәм! Киләсе көнгә ышанычлы булу бик мөһим, шулай бит, кызлар? – дип язган Алсу шәхси аккаунтында.
Ә сез җырчы фикере белән килешәсезме?
