Алсу Фазлыевага тамашачы: «Рамазановлардан калышмагыз, бәби ашын гөрләтеп үткәрегез!»
Татар эстрадасы җырчысы Алсу Фазлыева яңа туган кызы Зифа хөрмәтенә бәби ашын уздырмакчы була. Ничек уздырырга кирәген ул инстаграм битендә халыктан сораган.
Бүген безнең йортыбызның нурына — Зифабызга бер ай.
Вакытның тиз узганына шаккатып утырам. Кеше баласы тиз үсә, диләр, үзеңнеке тагын да тизрәк икән. Бар да кичә генә булган кебек. Ә бала табуга бер ай кала вакыт бик озак үткән иде. Эсседә көтә-көтә хәлем бетте…
40 көн тулгач, бәби ашы ясыйсы килә. Тик аны хәзер ничек уздыралар икән? Бәлки сезнең тәкъдимнәр, киңәшләр булыр? Сез сабыегызның исем ашын ничек үткәргән идегез? — дип киңәш сораган Алсу Фазлыева.
Халык яшь әнигә төрле киңәш-фикерен язган: «Хәзер бәби ашы түгел, бәби туе үткәрәләр. Рамазановлардан калышмаска инде. Рейтингыгыз түбән тәгәрәр. Сезгә алардан уздырасы», «Рамазановларныкы кебек инде, Алсу. Гөрләтеп», — дигәннәр.
Алсу Фазлыева исә: «Без беркем белән дә ярышырга җыенмыйбыз, истәлекле итеп уздырасыбыз гына килә», — дип җаваплаган.
«Исемне мөселманнар 7 көнгә кадәр кушарга тиешләр. 40 көнгә кадәр ана гына үзен сакларга тиеш: авыр күтәрмәскә, яланаяк йөрмәскә һ.б. Ә бәби ашын бездә хәзер мәчеттә генә үткәрәләр. Коръән укыталар», «Бөтенләй үткәрмәдек. Бабай килеп исем кушты да, әти-әниләр белән чәй эчтек», «Иң якын туганнарыгызны гына чакырып үткәрегез. Инфекция керә кермәсен йортыгызга», — дип киңәш биргәннәр Алсу Фазлыевага.