Әлмәттә булган шаккатыргыч вакыйганың нечкәлекләре билгеле булды. Биредә торак йорт подъездында юрганга төрелгән яңа туган сабый табылган. Тикшерү мәгълүматларына караганда, баланы әбисе калдырып киткән. Бу хакта «Татар-информ» хәбәр итте.
Шәһәр балалар хастаханәсенең балалар стационары җитәкчесе вазифаларын башкаручы Разия Галиева сөйләвенчә, ир бала табылганчы берничә сәгать алдан гына дөньяга туган булган – якынча иртәнге 6:00 сәгатьтә. Аның кендеге әле юеш иде, дип сөйләде Галиева. Баланың авырлыгы – 2808 грамм, буе – 50 сантиметр. Сабыйның тәне алсу төстә һәм җылы булган, аңа памперс кидергәннәр һәм юрганга төргәннәр.
Баланың гомеренә куркыныч янамый, аның хәле тотрыклы. Сабыйны ясалма тукландыралар, аның тән авырлыгы арта башлаган.
Шәһәр администрациясендә билгеләп үтүләренчә, Әлмәттә мондый очрак беренче тапкыр булган. Әлмәт районы башлыгының матбугат сәркатибе Дарья Антонова сөйләгәнчә, бала атна дәвамында табиблар күзәтүендә булачак. Аннан соң сабыйның язмышы белән опека һәм попечительлек органнары шөгыльләнәчәк.
Хокук саклау органнары әлеге факт нигезендә «Куркыныч шартларда калдыру» маддәсе буенча җинаять эше ачкан.
