Алманы рөхсәтсез алган өчен, әби унөч яшьлек оныгын кыйнаган һәм салкын урамга куып чыгарган

Башкортстанның Авыргазы районында әби кеше 13 яшьлек оныгын кыйнап ташлый һәм урамга куып чыгара. Кыз бала белән шундый вәхши мөнәсәбәтләр өчен, әбигә карата җинаять эше ачыла. Бу турыда «Башинформ» агентлыгы хәбәр итте.

Прокуратура тикшерүе материалларыннан күренгәнчә, 60 яшьлек хатын 7 һәм 13 яшьлек ике оныгын тәрбияли. Балаларның ата-анасы юк. Узган елның декабрендә өйдә талаш була. Әби кеше олы оныгы алманы рөхсәтсез алган дип шикләнә. Әби баланы кыйный һәм өйдән куып чыгара. 13 яшьлек кыз өстенә җылы кием кимәгән килеш, кышкы аяк киемсез генә салкын урамда кала. Ул биш километр ераклыктагы күрше авылга апасы янына китә. Бала килеп җиткәч, туган апасы аны хастаханәгә илтә.

Хокук саклау органнары җинаять эше ача. Бу әбине балигъ булмаганнарны тәрбияләү буенча вазифасын үтәмәүдә гаеплиләр. Хәзерге вакытта ике бала да туган апаларында яши. Аларның гомеренә куркыныч янамый.