Зөлфәт хәзрәт Габдуллин сәхифәсендә аңлатканча, «кунакларны еш каршы алучы йорт — Аллаһ Тагәләнең яраткан йортыдыр».
Кечегә дә, олыга да ишеге ачык булган йорт нинди күркәм йорт! Мондый йортка Аллаһының рәхмәтләре һәм бәрәкәтләре ява.
Расулуллаһ салләллаһу галәйһи вә сәлләм болай дип әйткән: «Әгәр Аллаһ Тагәлә бер кешегә изгелек теләсә, аңа бүләген җибәрер».
Сәхәбәләр: «Нинди бүләк ул?» дип сорадылар.
Расүлебез салләллаһу галәйһи вә сәлләм: «Ул кунак, кунак үз ризыгын алып килә һәм ул йорт әһелләренең гөнаһларын сөртеп алып китә», дип җавап бирде.
Әнәс ибн Мәлик рәхмәтуллаһи галәйһ: «Кунак кермәгән йортка фәрештәләр дә керми», диде.
Кабаттан Расүлебез салләллаһу галәйһи вә сәлләм әйтте: «Кунак, җәннәткә алып керүче юлчыдыр».
Әбу Һүрәйра радыяллаһу анһудан риваять ителә, Расулуллаһ салләллаһу галәйһи вә сәлләм: «Кем Аллаһ Тагәләгә һәм ахирәт көненә иман китерсә, кунагын хөрмәт итсен», диде. Имам Әхмәд риваять итте.