Ринат Рахматуллин сторислары аша үзенең тамашачысына мөрәҗәгать итте. Җырчының элек «тәртип бозып йөргән», планлаштырылган концертларына килмичә калган вакытлары еш булган. Ул тыңлаучыларына үзенең үзгәрүе турында сөйли, элекке хаталарын кабатламаска сүз бирә.
Дуслар, бүген бер мөһим темага кагылырга телим. Комментарийлардан күренгәнчә, бу күпләрне борчый. Элек концертларга килмәгән чакларым булды. Аерым шәһәрләрдә бу берничә тапкыр кабатланды. Мин моны яшереп тормыйм, кайчак мөһим сәбәпләре дә булмады. Килмичә калуларым, күпчелек, алкоголь аркасында…
Үземнең һәр концертымда әйтәм – хәзер мин элекке Ринат Рахматуллин түгел. Минем карашларым, принципларым, тормышым тулысынча, 180 градуска үзгәрде. Тагын бер кат кабатлыйм – мин сезне алдаламыйм. Бу сезонга планлаштырылган барлык концертларым да үтте һәм үтәчәк, Аллаһы боерса. Хәзер минем максатларым башка. Мин яңадан элекке дәрәҗәмә күтәрелергә, аннан да югарырак үсәргә телим. Үзем өчен тагын да югарырак проектлар әзерлим. Һәм әлбәттә, бу юлда минем белән сез булмасагыз, кадерле тамашачым, мин бу дәрәҗәгә ирешә алмас идем.
Сезгә зур рәхмәт, сез һәрвакыт минем белән калдыгыз. Мин хәзер – башка Ринат Рахматуллин. Элекке хаталарымны кабатламаска сүз бирәм, – дигән Ринат Рахматуллин.