Алия Карачурина-Төхвәтуллинаның яңа образы тамашачыларында сораулар уяткан. Җырчыга тиздән башланып китәчәк сольный концертларында киячәк яңа күлмәге турында күңеленә тия торган сүзләр укырга туры килгән. Җырчының, яңа образын (мөгаен, бик кыйммәтле образындыр әле) урындыкка, театрдагы штораларга, тагын әллә нәрсәләргә охшатканнар.
«Сезнең фигурагыз шундый матур. Шундый фигурага мондый күлмәк кияләрме? Театрдагы шторалар кебек»;
«Нинди матур җырчыны нинди күлмәк белән хурлаганнар»;
«Күлмәккә ошамаган, ни алды, ни арты»;
«Коточкыч күлмәк бу»;
«Бөтен матурлыгын бетереп, нинди килешсез күлмәк кигән»;
«Күлмәге – әстәгъфирулла тәүбә»;
«Күлмәгегез урындыкка охшаган»;
«Нинди күлмәк соң бу», – дип язып, җырчыга тиз арада стилистын алыштырырга киңәш иткән халык.
Әлбәттә, гел тәнкыйть ияләре генә җыелмаган Алиянең сәхифәсенә, яраткан җырчыларын яклап язучылар да бик күп булган. Алар Алияне әлеге образда аккошка да, сәмруг кошка да, сандугачка да охшаталар. Тышкы кыяфәтенә генә игътибар юнәтмичә, җырчының искиткеч моңлы тавышына һәм мәгънәле җырларына басым ясарга кирәклеген искәртәләр.
Алия үзе дә, кайбер җырчылар кебек, хейтерларына тыныч кына читтән карап утыручылардан түгел. Ул сәхифәсендә үзе ягына «таш атып» комментарий калдыручыларга җавап та биреп чыккан.