Алия Исрафиловага Закир Шаһбан: «Сиңа үгезнең алгы боты, без арткы ботын алабыз...»
Алия Исрафилова Закир Шаһбан концертларында җырлап йөри бит инде. Менә сиңа мә, тамашадан соң җырчылар ит бүлешә башлаган икән… дип уйлый күрмәгез.
«Бүген эштән кайтканда, дефолт-мазар була калса, артистлар нишләп бетәр икән дип уйлап барган идем. Хәмдүнә апа, мәрхүмә, заманында колхозларда концерт куйганда, акча белән бергә фәлән хәтле ит яисә ничәдер капчык бәрәңге дә алып кайтканнары турында сөйләгәне искә төште. Без Закир абый Шаһбан белән эшлибез бит инде. Шундый бартер заманы әйләнеп кайтса, күз алдына китердем, имеш, Закир абый мине концертка чакырганда: «Алия, Мөслимдә концерт сөйләштем, сиңа үгезнең алгы боты, без арткы ботын алабыз, син ризамы?» — дип сорый. Яисә, Зөлфәт Зиннуров банкетта эшләргә чакырганда: «Өч түшкә каз һәм ун тавык итенә барасыңмы?»
Өйгә кайтып, компьютерны кабызган идем, Матбугат.руда «Илсөя Бәдретдиновага карабодай һәм шикәр бүләк иткәннәр» дигән язма килеп чыкты…
Татар юрап китерә, ди. Әллә ниләр уйлап йөрмик әле», — дип язган Алия Вконтакте челтәрендә.
