Олимпия чемпионы, фигуралы шуу остасы Алинә Заһитова Мәскәүдә Россия Спорт университетында (ГЦОЛИФК) дәүләт имтиханын «бик яхшы» билгесенә тапшырганын хәбәр итте. Бу шатлыклы яңалыкны спортчы үзенең телеграм-каналында уртаклаша.
«Ура! Дәүләт имтиханы «бик яхшы»га тапшырылды — тагын бер мөһим этап артта калды», – дип язган Заһитова.
Алинә Заһитова — 2018 елгы Олимпия уеннары чемпионы (ялгыз шуу), 2019 елгы дөнья чемпионы һәм 2018 елгы Европа чемпионы. Шулай ук аның исәбендә Гран-при финалында (2017) һәм Россия чемпионатында (2018) җиңүләр бар.
Алинә Заһитова — Россия тарихында фигуралы шууда барлык төп халыкара титулларны яулаган бердәнбер спортчы, дип яза «Татар-информ».